एमाले प्रतिपक्षमै बस्ने : मन्त्री पण्डित

भक्तपुर, १७ असोज । सामान्य प्रशासन मन्त्री लालबाबु पण्डितले एमाले सरकारमा नगए प्रतिपक्ष मै बस्ने बताउनु भएको छ ।
रफत सञ्चार क्लबले आयोजना गरेको साक्षतकार कार्यक्रममा उहाँले विगतमा भएका सहमतिलाई कार्यान्वयन नगरी बहुमतीय प्रक्रियामा गए एमाले प्रतिपक्षमै बस्ने सम्भावना बढेको बताउनु भएको हो ।
राष्ट्रपतिले ७ दिनको समय दिईरहँदा राजनीतिक समीकरण र नयाँ नयाँ धुव्रिकरणहरु देखिने क्रम जारी रहेकाले समेत अबको सरकार सहमतिको भन्दा पनि बहुमतिय आधारमा निर्माण हुने उहाँको टिप्पणी थियो ।
उहाँले विश्वकै सर्वाेत्कृष्ट संविधान नेपालका जनप्रतिनिधिहरुबाट निर्माण भएको भन्दै कुनै पनि बैदेशिक हस्तक्षेप नेपालीलाई सैह्य नहुने बताउनु भयो । संविधान जारीसँगै विभिन्न खालका विषयहरु बाहिर आएको भन्दै उहाँले भन्नुभयो – नेपालको संविधान नेपालीका लागि बनाईएको हो कुनै विदेशीका लागि होइन जसकारण जस र अपजस नेपाली नागरिकका जनप्रतिनिधिले लिने र कमजोरीको सुधार गर्दै अगाडि बढ्नेमा जोड दिनु भयो ।
उहाँले भन्नुभयो – दक्षिण तर्फबाट जसरी अघोषित नाकाबन्दी लगायो त्यसले नेपालीलाई आत्मनिर्भर बन्न अभिप्रेरित गरेको भन्दै उत्तरतर्फको नाका खोल्न सरकार लागि परेको र उत्तर तर्फका सम्भावित नाकाहरु समेत खोल्ने र सञ्चालनमा आउन नसकेका नाकाहरु तत्कालै खोलाउन सरकार लाग्नु पर्ने बताउनु भयो ।
उहाँले श्रम बैंकको अवधारणा माथिको विधयेकमा छलफल बाँकी रहेको भन्दै यदि श्रम बैंकको अवधारणा लागू गर्न सके अरवका खाडीमा काम गर्न जाने नेपाली युवाहरुले देशमै रोजगार पाउने र देश समृद्धिको दिशातर्फ अग्रसर बन्ने बताउनु भयो ।
नेपालीहरुलाई दाताहरुको सहयोग यतिसम्म कि घरको करेसा बारीमा लगाउने तरकारी समेत उपलब्ध हुने बानीको विकासले परनिर्भरता बढेकाले अब नीतिनिर्माताहरुले दुरगामी सोच र  कार्यान्वयनको बाटो समातेर नेपाललाई आत्मनिर्भर बनाउन सबै क्षेत्र लाग्नु पर्ने र दाता देशको रुपमा नेपाललाई विश्व सामु परिचित गराउनु नै नेपालको भबिष्य रहेको उहाँको भनाई थियो ।
निजामती कर्मचारी मात्र नभएर देशका विभिन्न क्षेत्रलाई डि भि पि आर रहित बनाउन सबैको सहयोग उत्तिकै आवश्यक रहेको भन्दै धारा २९१ मा कुनै पनि नियक्ति, मनोनित, निर्वाचनमा भाग लिन नपाउने र डि भि पि आर त्यागेको भए पनि तीन महिना पश्चात उसलाई योग्य ठहराईने प्रावाधान रहेको बताउनु भयो ।